សមាគមត្រកូលតាំងនៅកម្ពុជាបានប្រារព្ធពិធីសម្ពោធអគារទីស្នាក់ការកណ្តាល និងអបអរគម្រប់ខួបលើកទី ២៥ឆ្នាំ

ភ្នំពេញ៖ ពិធីសម្ពោធអគារទីស្នាក់ការកណ្តាល រួមជាមួយនឹងពិធីគម្រប់ខួបលើកទី ២៥ឆ្នាំនៃ​ សមាគមត្រកូលតាំងនៅកម្ពុជា បានប្រព្រឹត្តទៅថ្ងៃទី២២ ខែមិថុនា ឆ្នាំ២០២៥។ ពិធីនេះមានការអញ្ជើញចូលរួមពីភ្ញៀវកិត្តិយសសំខាន់ៗជាច្រើន រួមមាន​ ប្រធានប្តូវេនសមាគមសម្ព័ន្ធខ្មែរ ចិននៅកម្ពុជា លោកឧកញ៉ា ជា សៀង ប្រធានក្រុមប្រឹក្សាត្រួតពិនិត្យ នៃសមាគមសម្ព័ន្ធខ្មែរចិននៅកម្ពុជា លោកឧកញ្ញាតេង ឡាយ អនុប្រធានអចិន្ត្រៃយ៍សមាគមសម្ព័ន្ធខ្មែរ ចិននៅកម្ពុជា លោកឧកញ៉ា ជាសឿន ព្រមទាំងសមាជិកត្រកូលតាំងដែលមកពីទូទាំងពិភពលោក និងភ្ញៀវកិត្តិយសជាច្រើនផ្សេងទៀត។

លោក តាំង ស្រ៊ីអ៊ុយ ប្រធានគណៈកម្មាធិការសាងសង់នៃសមាគមត្រកូល តាំងនៅកម្ពុជា បានឱ្យដឹងថា អគារទីស្នាក់ការកណ្តាលនេះមានផ្ទៃដីសរុប ៤២០០ម៉ែត្រក្រឡា និងមាន ៥ជាន់។ ជាន់ទី១ គឺជាកន្លែងចតរថយន្ត និងបន្ទប់គេងសម្រាប់បុគ្គលិក។ ជាន់ទី២ ដល់ ជាន់ទី៤ គឺជាជាន់មុខងារសម្រាប់ប្រជុំ និងការិយាល័យ។ ជាន់ទី៥ គឺជាសាលគោរពវិញ្ញាណក្ខន្ធដូនតា ដើម្បីរក្សាទំនាក់ទំនងត្រកូលអោយបានគង់វង្ស។

ប្រធានសមាគមត្រកូលតាំងនៅកម្ពុជា លោកឧកញ៉ា​ កែវ សាន បានថ្លែងថា៖ «អស់រយៈពេល ២៥ឆ្នាំកន្លងមក សមាគមតែងតែប្រកាន់ខ្ជាប់នូវគោលបំណង “ពង្រឹងភាពសុខដុមរមនាក្នុងត្រកូលគ្រួសារ និងបម្រើសហគមន៍ជនជាតិចិននៅក្រៅប្រទេស” ដោយទទួលបានលទ្ធផលជាផ្លែផ្កា។ អគារទីស្នាក់ការកណ្តាលនេះ គឺជាផលជោគជ័យរួមនៃសមាគមត្រកូលតាំង។ នាពេលអនាគត សមាគមនឹងប្រើប្រាស់អគារនេះជាវេទិកា ដើម្បីពង្រីកសកម្មភាពសមាគមបន្ថែមទៀត ធ្វើឱ្យកាន់តែស៊ីជម្រៅនូវមិត្តភាពត្រកូលគ្រួសារ បណ្តុះបណ្តាលកម្លាំងវ័យក្មេង និងបម្រើសហគមន៍ឱ្យបានកាន់តែប្រសើរ ហើយនឹងខិតខំជំរុញការទំនាក់ទំនងកម្ពុជា និងចិនកាន់តែខ្លាំង ដោយបន្តរួមចំណែកដល់មិត្តភាព និងការអភិវឌ្ឍសង្គមរបស់ប្រទេសទាំងពីរ។»

ប្រធានប្តូវេនសមាគមសម្ព័ន្ធខ្មែរ ចិននៅកម្ពុជា លោកឧកញ៉ា ជា សៀង ដែលតំណាងឱ្យលោកអ្នកឧកញ៉ា ពុង ឃាវសែ ប្រធាន​សមាគម​សម្ព័ន្ធ​ខ្មែរចិន​នៅកម្ពុជា និង​សមាគម បានថ្លែងអបអរសាទរយ៉ាងកក់ក្តៅចំពោះការសម្ពោធអគារទីស្នាក់ការកណ្តាលរបស់សមាគមត្រកូលតាំងនៅកម្ពុជា ព្រមទាំងខួបលើកទី ២៥នៃការបង្កើតសមាគមនេះ។

នៅទីបញ្ចប់នៃកម្មពិធី គណៈដឹកនាំសមាគមត្រកូលតាំងនៅកម្ពុជា តំណាងភ្ញៀវកិត្តិយស និងសមាជិកត្រកូលតាំងដែលមកពីតំបន់ផ្សេងៗ បានជួបជុំគ្នានៅខាងមុខអគារទីស្នាក់ការកណ្តាល ដើម្បីថតរូបជាក្រុមធំទុកជា​អនុស្សាវរីយ៍​ ដើម្បីជាសក្ខីភាពបង្ហាញនូវសេចក្ដីថ្លៃថ្នូរ និងពេលវេលាដ៏មានលក្ខណៈប្រវត្តិសាស្ត្រនេះ។

នៅល្ងាចថ្ងៃដដែរ ពិធីអបអរគម្រប់ខួបលើកទី ២៥ឆ្នាំ នៃសមាគមត្រកូលតាំងនៅកម្ពុជាត្រូវបានប្រារព្ធឡើងនៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ៕