ពិធីបើកសិក្ខាសាលាស្តីពីការអប់រំ «ភាសាចិន និង ជំនាញវិជ្ជាជីវៈ»

សិក្ខាសាលាស្តីពីការអភិវឌ្ឍន៍វិស័យអប់រំ”ភាសាចិន+ជំនាញវិជ្ជាជីវៈ” សម្រាប់ប្រទេសអាស៊ាន ដែលរៀបចំនៅសាកលវិទ្យាល័យបច្ចេកវិទ្យា និងវិទ្យាសាស្រ្តកម្ពុជាចិននាថ្ងៃទី១៤ ខែសីហា ឆ្នាំ២០២៥។ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីបើកសិក្ខាសាលា​ ដោយមានការចូលរួមពីសំណាក់ ឯកឧត្តម JIANG NAN អគ្គទីប្រឹក្សានៃស្ថានទូតសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា, ឯកឧត្តម ជា កុសល រដ្ឋលេខាធិការ ក្រសួងការងារ និងបណ្ដុះបណ្ដាលវិជ្ជាជីវៈ, មជ្ឈមណ្ឌលផ្លាស់ប្តូរ និងសហប្រតិបត្តិការភាសាចិន-ភាសាបរទេសរបស់ក្រសួងអប់រំចិន ក្រសួងអប់រំ និងក្រសួងការងារកម្ពុជា សាកលវិទ្យាល័យវិជ្ជាជីវៈ ណានជីង នៃបច្ចេកវិទ្យាឧស្សាហកម្ម សាកលវិទ្យាល័យបច្ចេកវិទ្យា​ លោកអ្នកឧកញ៉ា ពុង ឃាវសែ ប្រធានសមាគមសម្ព័ន្ធខ្មែរចិននៅកម្ពុជា ឯកឧត្តម លោកជំទាវ លោក លោកស្រី ភ្ញៀវកិត្តិយសជាតិ អន្តរជាតិ លោកគ្រូ អ្នកគ្រូ និងសិស្សនិស្សិត ក្រោមប្រធានបទ «ការបង្កើតស្តង់ដា និងការបណ្តុះធនធានទេពកោសល្យរួមគ្នា» ។

លោកអ្នកឧកញ៉ា ពុង ឃាវសែ ប្រធានសមាគមសម្ព័ន្ធខ្មែរចិននៅកម្ពុជាបានថ្លែងថា វិទ្យាល័យបច្ចេកវិទ្យា និងវិទ្យាសាស្រ្តកម្ពុជាចិន ដែលជាសាកលវិទ្យាល័យបច្ចេកវិទ្យានៅបរទេសដំបូងគេសម្រាប់អប់រំវិជ្ជាជីវៈចិន ដែលមានការសហការសាងសង់ដោយសមាគមសម្ព័ន្ធខ្មែរ-ចិននៅកម្ពុជា និងសាកលវិទ្យាល័យវិជ្ជាជីវៈ ណានជីង នៃបច្ចេកវិទ្យាឧស្សាហកម្ម កំពុងដើរតួយ៉ាងសកម្មក្នុងការជំរុញការអភិវឌ្ឍន៍សេដ្ឋកិច្ចសង្គមក្នុងស្រុក ក្លាយជាគំរូនៃកិច្ចសហប្រតិបត្តិការអប់រំចិន-កម្ពុជា និងទទួលបានការសាទរយ៉ាងទូលំទូលាយពីរដ្ឋាភិបាលកម្ពុជា និងប្រជាពលរដ្ឋ។

ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា កិច្ចសហប្រតិបត្តិការ “ភាសាចិន+ជំនាញវិជ្ជាជីវៈ” រវាងកម្ពុជា និងចិន បានទទួលលទ្ធផលជាផ្លែផ្កា។ ទេពកោសល្យរួមដែលត្រូវបានបណ្តុះដោយសាកលវិទ្យាល័យបច្ចេកវិទ្យា និងវិទ្យាសាស្រ្តកម្ពុជាចិន បានបម្រើតម្រូវការអភិវឌ្ឍន៍ជាតិយ៉ាងមានប្រសិទ្ធភាព។

ឯកឧត្តម យូ យូនហ្វេង បានសង្កត់ធ្ងន់ថា មជ្ឈមណ្ឌលផ្លាស់ប្តូរ និងសហប្រតិបត្តិការភាសាចិន-ភាសាបរទេសរបស់ក្រសួងអប់រំចិននឹងចូលរួមជាមួយភាគីពាក់ព័ន្ធដទៃទៀត ដើម្បីពង្រឹងកិច្ចសហការលើវិស័យដូចជា ការបំពាក់សមត្ថភាពឌីជីថល និងការកសាងសមត្ថភាពជាដើម។

ឯកឧត្តម ជាំង ណាន បានកត់សម្គាល់ថា គំរូនៃកិច្ចសហប្រតិបត្តិការនេះបានឆ្លើយតបទៅនឹងតម្រូវការទេពកោសល្យរបស់កម្ពុជា ហើយនឹងកំពុងពង្រីកឥទ្ធិពលទៅកាន់តំបន់អាស៊ាន។

ឯកឧត្តម ជា កុសល រដ្ឋលេខាធិការ ក្រសួងការងារ និងបណ្ដុះបណ្ដាលវិជ្ជាជីវៈ បានបញ្ជាក់ថា កិច្ចសហប្រតិបត្តិការនេះបានលើកកម្ពស់ជំនាញ និងសមត្ថភាពប្រកួតប្រជែងរបស់កម្លាំងការងាររបស់កម្ពុជា។

ក្នុងឱកាសនេះ សាកលវិទ្យាល័យបច្ចេកវិទ្យា និងវិទ្យាសាស្រ្តកម្ពុជាចិន បានចុះហត្ថលេខាកិច្ចព្រមព្រៀងជាមួយក្រុមហ៊ុន BYD និង ក្រុមហ៊ុន Elephant Auto ដើម្បីរួមគ្នាបង្កើតមជ្ឈមណ្ឌលបណ្តុះបណ្តាលទេពកោសល្យយានយន្តថាមពលថ្មីមួយនៅកម្ពុជា។ តំណាងប្រទេសអាស៊ានជិត៣០០នាក់បានចូលរួមក្នុងសិក្ខាសាលានេះ និងបានទស្សនាក្រុមហ៊ុនក្នុងស្រុកផងដែរ៕