កម្ពុជា បដិសេធចំពោះការផ្សព្វផ្សាយរបស់ប្រព័ន្ធផ្សព្វផ្សាយថៃ ដែលបានចោទប្រកាន់ថាយោធិនខ្មែរម្នាក់មកពីបញ្ជាការដ្ឋានអង្គរក្សត្រូវបានចាប់ខ្លួន

កម្ពុជាបានបដិសេធយ៉ាងដាច់អហង្ការចំពោះការផ្សព្វផ្សាយរបស់ប្រព័ន្ធផ្សព្វផ្សាយថៃមួយចំនួន ដែលបានចោទប្រកាន់ថាយោធិនខ្មែរម្នាក់មកពីបញ្ជាការដ្ឋានអង្គរក្សត្រូវបានចាប់ខ្លួនក្នុងខេត្តបុរីរ៉ាំ ប្រទេសថៃ។ នេះបើតាមប្រសាសន៍របស់លោកជំទាវអ្នកនាំពាក្យក្រសួងការពារជាតិនៅព្រឹកថ្ងៃទី៦ ខែសីហា ឆ្នាំ២០២៥។

លោកជំទាវអ្នកនាំពាក្យបានបញ្ជាក់ថាព័ត៌មាននេះគឺគ្មានមូលដ្ឋាននិងជាការប្រឌិតឡើងក្នុងចេតនាមូលបង្កាច់លើកម្ពុជា។ ព័ត៌មានមិនពិតនេះបានលើកឡើងថា ប៉ូលីសថៃបានចាប់ខ្លួនទាហានខ្មែរម្នាក់ដែលសង្ស័យថាលបលាក់ខ្លួនដើម្បីបញ្ជូនព័ត៌មានចលនាយោធាថៃមកកម្ពុជា។

ដើម្បីឆ្លើយតបនឹងការចោទប្រកាន់នេះ កម្ពុជាបានពន្យល់ថា កងកម្លាំងយោធាកម្ពុជាមិនអនុញ្ញាតឱ្យយោធិនដែលមានស្នាមសាក់លើខ្លួនដូចដែលភាគីថៃបានបង្ហាញនោះ ចូលបម្រើការងារជាដាច់ខាតឡើយ។

លោកជំទាវអ្នកនាំពាក្យបានអំពាវនាវដល់ភាគីថៃឱ្យបញ្ឈប់ជាបន្ទាន់នូវការផ្សព្វផ្សាយព័ត៌មានមិនពិត គ្មានវិជ្ជាជីវៈ និងគ្មានមូលដ្ឋានច្បាស់លាស់បែបនេះ។