ពិធីចុះហត្ថលេខាលើអនុស្សរណៈ រវាងគណៈកម្មាធិការប្រកួតប្រជែងកម្ពុជា «គ.ប.ក.» និងគណៈកម្មាធិការប្រកួតប្រជែងនៃតំបន់រដ្ឋបាលពិសេសហុងកុង «HKCC»

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការប្រកួតប្រជែងកម្ពុជា (CCC) និងលោក Samuel Chan ប្រធានគណៈកម្មាធិការប្រកួតប្រជែងនៃតំបន់រដ្ឋបាលពិសេសហុងកុង (HKCC) នៃសាធារណរដ្ឋប្រជាមានិតចិន បានអញ្ជើញជាអធិបតីក្នុងពិធីចុះហត្ថលេខាលើអនុស្សរណៈនៃការយោគយល់គ្នា(MoU) រវាង គ.ប.ក. និង HKCC លើការអនុវត្តគោលនយោបាយ និងច្បាប់ស្តីពីការប្រកួតប្រជែង នាព្រឹកថ្ងៃពុធ ទី១២ ខែវិច្ឆិកា ឆ្នាំ២០២៥ នៅទីស្តីការក្រសួងពាណិជ្ជកម្ម។

អនុស្សរណៈនៃការយោគយល់គ្នារវាងភាគីទាំងពីរ គឺជាការបង្កើតក្របខ័ណ្ឌផ្លូវការសម្រាប់កិច្ចសហប្រតិបត្តិការរវាងគណៈកម្មាធិការទាំងពីរ ដោយផ្តោតលើការផ្លាស់ប្តូរព័ត៌មាន កិច្ចសហការលើការងារបច្ចេកទេស និងការកសាងសមត្ថភាពមន្ត្រី ដើម្បីពង្រឹងការអនុវត្តច្បាប់ស្តីពីការប្រកួតប្រជែង ប្រកបដោយប្រសិទ្ធភាពនៅក្នុងដែនសមត្ថកិច្ចនៃភាគីទាំងពីរ។

- Advertise -

ថ្លែងក្នុងសុន្ទរកថាបើក លោកជំទាវរដ្ឋមន្ត្រីបានគូសបញ្ជាក់ពីសារៈសំខាន់នៃកិច្ចសហការការចែករំលែកចំណេះដឹង និងការគាំទ្រគ្នាទៅវិញទៅមក ក្នុងចំណោមស្ថាប័នប្រកួតប្រជែង ក្នុងនោះផងដែរ អនុស្សរណៈនៃការយោគយល់គ្នានេះ ជាចក្ខុវិស័យ និងការប្តេជ្ញាចិត្តយ៉ាងមុះមុត ក្នុងគោលដៅពង្រឹងសមត្ថភាពស្ថាប័ន និងស្របតាមឧត្តមានុវត្តល្អៗរបស់អន្តរជាតិ។ លោកជំទាវរដ្ឋមន្ត្រី បានលើកឡើងផងដែរថា ពុំមានអាជ្ញាធរឬស្ថាប័នប្រកួតប្រជែងណា ដែលអាចសម្រេចបានជោគជ័យបាន ដោយពុំមានកិច្ចសហការរវាងគ្នានឹងគ្នាឡើយ។ ភាពជាដៃគូសហការនេះនឹងជួយពង្រឹងកិច្ចសហប្រតិបត្តិការ លើកកម្ពស់ភាពស៊ីសង្វាក់គ្នាក្នុងការអនុវត្តច្បាប់ និងជួយឱ្យស្ថាប័នទាំងពីរ ចៀសវាងពីសកម្មភាពត្រួតស៊ីគ្នាក្នុងករណីបទល្មើសឆ្លងដែន។
លោកជំទាវរដ្ឋមន្ត្រីក៏បានកត់សម្គាល់ផងដែរថា ការប្រកួតប្រជែងដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចប្រកបដោយចីរភាព តាមរយៈការជំរុញការច្នៃប្រឌិត ប្រសិទ្ធភាព និងសុខុមាលភាពសម្រាប់អ្នកប្រើប្រាស់។

( ក្រសួងព័ត៍មាន)