កម្ពុជាបញ្ចុះតម្លៃទិដ្ឋាការអេឡិចត្រូនិកចាប់ពីថ្ងៃចូលឆ្នាំសកល ឆ្នាំ២០២៥ តទៅ

ថ្ងៃទី២៨ ខែធ្នូ ឆ្នាំ២០២៤ រាជរដ្ឋាភិបាល​កម្ពុជា​បានចេញ​សេចក្តី​ប្រកាស​ព័ត៌មាន សម្រេច​បញ្ចុះ​តម្លៃ​ទិដ្ឋាការ​អេឡិចត្រូនិក (e-Visa) ប្រភេទ​ទេសចរ​និងប្រភេទ​ធម្មតា ដោយចាប់ផ្តើម​អនុវត្ត​ចាប់ពី​ថ្ងៃទី១ ខែមករា ឆ្នាំ២០២៥ តទៅ។

សេចក្តី​ប្រកាស​ព័ត៌មាន​នេះបានឱ្យ​ដឹងថា ក្នុងគោលដៅ​ផ្តល់ភាព​ងាយស្រួល​ដល់អ្នកដំណើរ​និងទេសចរ​ដែលចូលមក​ប្រទេស​កម្ពុជា រាជរដ្ឋាភិបាល​កម្ពុជា​បានណែនាំ​ដល់ក្រសួង​ស្ថាប័ន​ពាក់ព័ន្ធ ឱ្យកែលម្អ​និងសម្រួល​នីតិវិធី​ក្នុងការ​ផ្តល់ទិដ្ឋាការ​តាមប្រព័ន្ធ e-Visa និង​ប្រព័ន្ធ e-Arrival ឱ្យមក​នៅក្នុងអេកូឡូស៊ី​ (Ecosystem) តែមួយ​របស់​រាជរដ្ឋាភិបាល។

ទន្ទឹមនឹងនេះ រាជរដ្ឋាភិបាល​កម្ពុជា​ក៏បញ្ចុះ​តម្លៃ​ e-Visa ប្រភេទ​ទេសចរ (T) និងប្រភេទ​ធម្មតា (E)  ដោយក្នុងនោះ e-Visa T បញ្ចុះ​តម្លៃ​ពី ៣៦ ដុល្លារ​អាម៉េរិក មកនៅត្រឹម ៣០ ដុល្លារ និង e-Visa E បញ្ចុះ​តម្លៃពី ៤២ ដុល្លារ មកនៅ​ត្រឹម ៣៥ ដុល្លារ។

សេចក្ដី​ប្រកាស​ព័ត៌មាន​នេះបាន​បញ្ជាក់ថា ការកែទម្រង់​ខាងលើនេះ នឹងចាប់ផ្តើម​អនុវត្ត​ចាប់ពី​ថ្ងៃទី១ ខែមករា ឆ្នាំ២០២៥ តទៅ៕