ទំនួលខុសត្រូវរបស់ចិន ជាប្រទេសមហាអំណាចក្នុងការដោះស្រាយបញ្ហាព្រំដែនកម្ពុជា-ថៃ

លោក វ៉ាង វិនប៊ីន ឯកអគ្គរដ្ឋទូតចិនប្រចាំប្រទេសកម្ពុជាបានបង្ហោះនៅលើបណ្តាញសង្គម ដោយបញ្ជាក់ជាថ្មីពីការគាំទ្រយ៉ាងម៉ឺងម៉ាត់របស់ចិនចំពោះការអនុវត្តកិច្ចព្រមព្រៀងរវាងថ្នាក់ដឹកនាំកម្ពុជា និងថៃ ដែលបានសម្រេចនៅក្នុងកិច្ចប្រជុំនៅភូត្រាចាយ៉ា (Putrajaya) ប្រទេសម៉ាឡេស៊ីនាថ្ងៃទី២១ ខែសីហា ឆ្នាំ២០២៥។ ការបញ្ជាក់ជំហរនេះ មិនត្រឹមតែបង្ហាញពីតួនាទីរបស់ចិនក្នុងកិច្ចការក្នុងតំបន់ប៉ុណ្ណោះទេ ថែមទាំងបង្កើតតួនាទីដ៏សំខាន់របស់ចិនក្នុងការថែរក្សាសន្តិភាព និងស្ថិរភាពក្នុងតំបន់។

សម្របសម្រួលយ៉ាងសកម្ម និងជំរុញការឯកភាព

ក្រោយពីជម្លោះព្រំដែនកម្ពុជា-ថៃផ្ទុះឡើង ចិនតែងតែយកចិត្តទុកដាក់តាមដានចំពោះស្ថានការណ៍ និងដើរតួនាទីយ៉ាងសកម្មក្នុងន័យស្ថាបនា។ ក្នុងឱកាសកិច្ចប្រជុំពិសេសនៅក្រោមក្របខណ្ឌអាស៊ាន ដែលធ្វើឡើងនៅកូឡាឡាំពួ ប្រទេសម៉ាឡេស៊ី នាថ្ងៃទី២៨ ខែកក្កដា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងនាយករដ្ឋមន្ត្រីស្តីទីថៃ លោក ភូមថាំ វីឆាយ៉ាឆ័យ (Phumtham Wechayachai) ក្រោមអធិបតីភាពរបស់លោកនាយករដ្ឋមន្ត្រីម៉ាឡេស៊ី Anwar Ibrahim បានឈានដល់ការឯកភាពគ្នាលើបទឈប់បាញ់។ ក្នុងនាមជាប្រទេសចូលរួមដ៏សំខាន់មួយ ចិនបានបញ្ជូនតំណាងទៅចូលរួមកិច្ចប្រជុំ និងសម្របសម្រួលយ៉ាងសកម្ម ដោយដើរតួនាយ៉ាងសំខាន់ក្នុងការជំរុញឲ្យភាគីទាំងពីរសម្រេចបានកិច្ចព្រមព្រៀងនេះ។

កិច្ច​ប្រជុំ​ត្រីភាគី​ក្រៅ​ផ្លូវ​ការ​រវាង​ចិន-កម្ពុជា-ថៃ បានធ្វើឡើងនៅសៀងហៃនាថ្ងៃទី៣០ ខែកក្កដា ឆ្នាំ២០២៥ ដោយឯកឧត្តម SUN Weidong អនុរដ្ឋមន្ត្រីក្រសួងការបរទេសចិន បានចូលរួមជាមួយនឹងប្រតិភូកម្ពុជា និងថៃ។ ក្នុងឱកាសកិច្ចប្រជុំនេះ ភាគីកម្ពុជា និងថៃ បាន​បញ្ជាក់​ជាថ្មី​ដល់​​ចិន​ថា ​នឹង​គោរព​តាមកិច្ចព្រមព្រៀង​បទ​ឈប់​បាញ់ ហើយ​បាន​កោតសរសើរ​ចំពោះ​តួនាទី​វិជ្ជមាន​របស់​ចិនក្នុងការបន្ធូរបន្ថយស្ថានការណ៍។ កិច្ចប្រជុំនេះ បានពង្រឹងការឯកភាពគ្នារវាងភាគីទាំង៣ ដោយដាក់មូលដ្ឋានគ្រឹះសម្រាប់ការអនុវត្តកិច្ចព្រមព្រៀងបទ​ឈប់​បាញ់ និងជំរុញឲ្យស្ថានការណ៍ព្រំដែនមានភាពស្ងប់​ស្ងាត់។

សម្របសម្រួលដោយពហុភាគី ដើម្បីពង្រឹងសមិទ្ធិផលបទឈប់បាញ់

ដើម្បីធានាកិច្ចព្រមព្រៀងបទឈប់បាញ់ត្រូវបានអនុវត្តឲ្យបានពេញលេញ ចិនបានបន្តរក្សាការទំនាក់ទំនងជិតស្និទ្ធជាមួយភាគីកម្ពុជា និងថៃ ព្រមទាំងប្រទេសអាស៊ានដទៃទៀត។ កិច្ច​ប្រជុំ​ពិសេស​នៃ​គណៈកម្មាធិការ​ព្រំដែន​ចម្រុះ​កម្ពុជា-ថៃ នាថ្ងៃទី៤ ខែសីហា ឆ្នាំ២០២៥ បានធ្វើឡើងនៅរដ្ឋធានីកូឡាឡាំពួ ប្រទេសម៉ាឡេស៊ី ដោយចិនបានបន្តគាំទ្រអាស៊ានក្នុងតួនាទីជំរុញដំណើរការបទឈប់បាញ់ និងសម្របសម្រួលជាមួយភាគីពាក់ព័ន្ធ ដើម្បីធានាឲ្យកិច្ចប្រជុំដំណើរការដោយរលូន។

លោក វ៉ាង វិនប៊ីន ឯកអគ្គរដ្ឋទូតចិនប្រចាំប្រទេសកម្ពុជា បានបង្ហោះអត្ថបទលើបណ្តាញសង្គមនាថ្ងៃទី២១ ខែសីហា​ ឆ្នាំ២០២៥ ដោយបញ្ជាក់យ៉ាងច្បាស់ថា ចិននឹងធ្វើការយ៉ាងច្រើនជាមួយកម្ពុជា ថៃ ព្រមទាំងម៉ាឡេស៊ី និងប្រទេសអាស៊ានដទៃទៀត ដើម្បីស្តារសន្តិសុខនិងសុខសន្តិសភាពនៅតំបន់ព្រំដែនកម្ពុជា-ថៃ។ ការបញ្ជាក់ជំហរនេះ មិនត្រឹមតែបង្ហាញពីការគាំទ្រយ៉ាងម៉ឺងម៉ាត់របស់ចិនចំពោះការអនុវត្តកិច្ចព្រមព្រៀងដែលសម្រេចបាននោះទេ ថែមទាំងបង្ហាញពីស្មារតីទទួលខុសត្រូវ និងការប្តេជ្ញាចិត្តរបស់ចិនក្នុងកិច្ចការក្នុងតំបន់ផងដែរ។

ការលើកកម្ពស់គោលគំនិតនៃសន្តិភាព ដឹកនាំកិច្ចសហប្រតិបត្តិការក្នុងតំបន់

ចិនតែងតែ​បាន​រក្សា​ជំហរ​សន្តិភាព យុត្តិធម៌ និង​ស្ថាបនា​យ៉ាង​ខ្ជាប់ខ្ជួន ដោយ​តស៊ូ​មតិ​ដើម្បី​ដោះស្រាយ​ជម្លោះ​តាម​រយៈ​ការ​សន្ទនា និងពិភាក្សា។ គោលជំហរនេះស្របតាមគោលការណ៍ស្នូលនៃគំនិតផ្តួចផ្តើមយុទ្ធសាស្ត្រសន្តិភាពសកល គឺប្រកាន់ខ្ជាប់នូវទស្សនៈវិស័យសន្តិភាពរួម ចម្រុះ កិច្ចសហការ និងនិរន្តរភាព ដោយលើកកម្ពស់ការអភិវឌ្ឍន៍​គំរូសន្តិសុខអាស៊ីរួម ដែលរួមបញ្ចូលសុវត្ថិភាព និងគ្រោះថ្នាក់ជាមួយគ្នា រួមសុខរួមទុក្ខជាមួយគ្នា មានការសន្ទនា និងការពិគ្រោះយោបល់ជាមួយគ្នា។

ក្នុងអំឡុងពេលដំណើរការសម្របសម្រួលជម្លោះ ចិនបានរក្សាជំហរមិនលំអៀង ដោយគាំទ្រការដឹកនាំរបស់អាស៊ាន និងគោរពតួនាទីរបស់ម៉ាឡេស៊ី ដែលជាប្រទេសប្រធានអាស៊ានប្តូវេន ព្រមទាំងជំរុញយ៉ាងសកម្មឲ្យភាគីពាក់ព័ន្ធសម្រេចកិច្ចព្រមព្រៀងឲ្យបានឆាប់�ហ័សបំផុត។ យុទ្ធសាស្ត្រការទូតប្រកបដោយប្រសិទ្ធភាពបែបនេះ មិនត្រឹមតែទទួលបានការទទួលស្គាល់ពីភាគីទាំងពីរប៉ុណ្ណោះទេ ថែមទាំងបានបញ្ចូលកម្លាំងចលករថ្មីដល់សន្តិភាព និងស្ថិរភាពក្នុងតំបន់។

ចូលរួមចំណែកដល់សន្តិភាព និងស្ថិរភាពក្នុងតំបន់

ការផ្ទុះឡើងនៃជម្លោះព្រំដែនកម្ពុជា-ថៃ បានបង្កគ្រោះថ្នាក់ធ្ងន់ធ្ងរដល់អាយុជីវិត និងទ្រព្យសម្បត្តិរបស់ប្រជាជននៃប្រទេសទាំងពីរ ព្រមទាំងមានផលប៉ះពាល់អវិជ្ជមានដល់ការអភិវឌ្ឍន៍សេដ្ឋកិច្ច និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍។ ជម្លោះនេះ បណ្តាលឲ្យមានការបិទច្រកព្រំដែន រំខាន​ដល់​ការ​ធ្វើ​ពាណិជ្ជកម្ម និងប៉ះពាល់​យ៉ាងធ្ងន់ធ្ងរ​ដល់​អាយុជីវិត​ប្រជាជនរស់នៅតាមព្រំដែន។ តាមរយៈការសម្រុះសម្រួលយ៉ាងសកម្ម ចិនបានជំរុញឲ្យភាគីទាំងពីរសម្រេចបាននៃកិច្ចព្រមព្រៀងបទឈប់បាញ់ និងបានបង្កើតលក្ខខណ្ឌសម្រាប់ការស្តារសណ្តាប់ធ្នាប់តាមធម្មតាវិញនៅតំបន់ព្រំដែន និងជំរុញឲ្យមានការស្តារឡើងវិញនូវសេដ្ឋកិច្ចក្នុងតំបន់។

ចិនក៏បានផ្តល់អនុសាសន៍ឲ្យបង្កើតយន្តការល្បាតរួមគ្នា ដើម្បីបន្ថយហានិភ័យនៃការបកស្រាយខុសក្នុងតំបន់ព្រំដែន ដោយបង្ហាញពីវិធីសាស្រ្តជាក់ស្តែងចំពោះសន្តិសុខរួម។ វិធានការនេះ មិនត្រឹមតែជួយបន្ធូរបន្ថយភាពតានតឹងបច្ចុប្បន្នប៉ុណ្ណោះទេ ថែមទាំងផ្តល់គំនិតសម្រាប់ការគ្រប់គ្រងប្រកបដោយប្រសិទ្ធភាពក្នុងរយៈពេលវែងនាពេលអនាគតផងដែរ។

លទ្ធផលវិជ្ជមានខាងលើដែលចិនបានចូលរួមសម្របសម្រួលនេះ មិនត្រឹមតែទទួលបានការទទួលស្គាល់ពីសហគមន៍អន្តរជាតិប៉ុណ្ណោះ ថែមទាំងចូលរួមចំណែកយ៉ាងសំខាន់ដល់សន្តិភាព និងស្ថិរភាពក្នុងតំបន់។ នាពេលអនាគត ចិននឹងបន្តប្រកាន់ខ្ជាប់នូវគោលការណ៍សន្តិភាព អភិវឌ្ឍន៍ កិច្ចសហការ និងនយោបាយឈ្នះឈ្នះ ដើម្បីកសាងសហគមន៍ជោគវាសនារួមនៃមនុស្សជាតិ៕