ឥទ្ធិពលរបស់ចិននៅក្នុងអង្គការសហប្រតិបត្តិការសៀងហៃ

កិច្ចប្រជុំលើកទី ២៥ នៃក្រុមប្រឹក្សាប្រមុខរដ្ឋ នៃសមាជិកអង្គការសហប្រតិបត្តិការសៀងហៃ (SCO) នឹងប្រព្រឹត្តទៅនៅទីក្រុងធានជីន ក្នុងខែកញ្ញា ឆ្នាំ ២០២៥។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏ដូចជាថ្នាក់ដឹកនាំប្រទេសជាង២០ និងប្រធានអង្គការអន្តរជាតិជាង១០ នឹងចូលរួមក្នុងព្រឹត្តិការណ៍លំដាប់កំពូលនេះ។

១. ឥទ្ធិពលរបស់ចិន៖ ឆ្អឹងខ្នងរបស់អង្គការសហប្រតិបត្តិការសៀងហៃ

ប្រទេសចិនដើរតួនាទីមិនអាចខ្វះបាននៅក្នុងអង្គការសហប្រតិបត្តិការសៀងហៃ។ ចាប់តាំងពីបង្កើតឡើងក្នុងឆ្នាំ ២០០១ អង្គការសហប្រតិបត្តិការសៀងហៃបានឆ្លងកាត់រយៈពេល ២៤ ឆ្នាំ ហើយបានរីកចម្រើនក្លាយជាអង្គការដ៏ធំមួយនៅក្នុងតំបន់ និងមានប្រជាជនយ៉ាងច្រើនផងដែរនៅលើពិភពលោក។ ដោយប្រើនៅកម្លាំងសេដ្ឋកិច្ចដ៏រឹងមាំ បច្ចេកវិទ្យាជឿនលឿន និងបទពិសោធន៍ការទូតដ៏ប៉ិនប្រសព្វ ចិនបានជួយជំរុញយ៉ាងសកម្មនូវកិច្ចសហប្រតិបត្តិការអង្គការសហប្រតិបត្តិការសៀងហៃក្នុងវិស័យផ្សេងៗ រួមទាំងសេដ្ឋកិច្ច សន្តិសុខ និងវប្បធម៌។ ក្នុងវិស័យសេដ្ឋកិច្ច ចិនបានផ្តល់នូវឱកាសវិនិយោគ និងពាណិជ្ជកម្មយ៉ាងច្រើនដល់ប្រទេសជាសមាជិកតាមរយៈគំនិតផ្តួចផ្តើម “ខ្សែក្រវាត់មួយ និងផ្លូវមួយ”  ដោយបានជំរុញសមាហរណកម្មសេដ្ឋកិច្ចក្នុងតំបន់។ ក្នុងវិស័យសន្តិសុខ ចិនបានលើកឡើងនូវទស្សនៈសន្តិសុខរួម ចម្រុះ កិច្ចសហការ និងចីរភាព ហើយបានរួមគ្នាជាមួយប្រទេសជាសមាជិក​ ដើម្បីដោះស្រាយការគំរាមកំហែងផ្នែកសន្តិសុខ ដែលមិនមែនជាប្រពៃណី ដូចជាភេរវកម្ម និងឧក្រិដ្ឋកម្មឆ្លងដែន និងរក្សាសន្តិភាព និងស្ថិរភាពក្នុងតំបន់។ ក្នុងវិស័យវប្បធម៌ ចិនបានជំរុញដល់ការផ្លាស់ប្តូរវប្បធម៌រវាងប្រទេសជាសមាជិក ដែលពង្រឹងការយល់ដឹង និងមិត្តភាពរវាងប្រជាជននៃប្រទេសនានា។ ឥទ្ធិពលរបស់ចិននៅក្នុងអង្គការសហប្រតិបត្តិការសៀងហៃ មិនត្រឹមតែបង្ហាញឱ្យឃើញនៅក្នុងការបង្កើតគោលនយោបាយ និងការវិនិយោគធនធានប៉ុណ្ណោះទេ ប៉ុន្តែក៏បង្ហាញឱ្យឃើញនៅក្នុងការគោរព និងអនុវត្តគំនិតកិច្ចសហប្រតិបត្តិការពហុភាគីផងដែរ។ ឥទ្ធិពលនេះផ្តល់នូវមូលដ្ឋាននយោបាយ​ដ៏​រឹង​មាំ និងឱកាសកិច្ចសហប្រតិបត្តិការរវាងចិន-កម្ពុជា។

២. កិច្ចសហប្រតិបត្តិការចិន-កម្ពុជា៖ សមិទ្ធិផលគួរឱ្យកត់សម្គាល់ និងមិត្តភាពស៊ីជម្រៅ

កិច្ចសហប្រតិបត្តិការចិន-កម្ពុជាបានសម្រេចបាននូវសមិទ្ធិផលគួរឱ្យកត់សម្គាល់ក្នុងវិស័យហេដ្ឋារចនាសម្ព័ន្ធ ការអភិវឌ្ឍន៍សេដ្ឋកិច្ច វប្បធម៌ និងការអប់រំ។ ក្នុងវិស័យហេដ្ឋារចនាសម្ព័ន្ធ ចិនបានជួយកម្ពុជាក្នុងការសាងសង់គម្រោងដឹកជញ្ជូនសំខាន់ៗ ដូចជាផ្លូវល្បឿនលឿនភ្នំពេញ-ព្រះសីហនុ ដែលបានកែលម្អលក្ខខណ្ឌដឹកជញ្ជូននៅកម្ពុជា និងការលើកកម្ពស់ការតភ្ជាប់ក្នុងតំបន់។ ក្នុងវិស័យសេដ្ឋកិច្ច ចិនបានបង្កើនការវិនិយោគរបស់ខ្លួននៅកម្ពុជាក្នុងវិស័យជាច្រើន រួមមានកសិកម្ម ឧស្សាហកម្ម ថាមពល និងវិស័យផ្សេងៗទៀត បង្កើតការងារជាច្រើន និងលើកកម្ពស់ការអភិវឌ្ឍសេដ្ឋកិច្ចចម្រុះនៅកម្ពុជា។ ក្នុងវិស័យវប្បធម៌-អប់រំ ចិនបានបង្កើតវិទ្យាស្ថានខុងជឺនៅកម្ពុជា ដោយជំរុញដល់ការផ្លាស់ប្តូរវប្បធម៌ និងពង្រឹងមិត្តភាពរវាងប្រជាជននៃប្រទេសទាំងពីរ។ លើសពីនេះ កិច្ចសហប្រតិបត្តិការរវាងចិន និងកម្ពុជាក្នុងវិស័យផ្សេងទៀត ដូចជាសុខាភិបាល និងការការពារបរិស្ថាន ក៏កំពុងអភិវឌ្ឍកាន់តែស៊ីជម្រៅផងដែរ។ សមិទ្ធិផលនៃកិច្ចសហប្រតិបត្តិការទាំងនេះ មិនត្រឹមតែផ្តល់នូវការគាំទ្រដល់ការអភិវឌ្ឍរបស់កម្ពុជាប៉ុណ្ណោះទេ ថែមទាំងឆ្លុះបញ្ចាំងឱ្យឃើញនូវកិច្ចសហប្រតិបត្តិការដ៏ជិតស្និទ្ធរវាងប្រទេសទាំងពីរក្រោមគោលការណ៍នៃផលប្រយោជន៍ទៅវិញទៅមក និងនយោបាយឈ្នះ-ឈ្នះ។

៣.និន្នាការនាពេលអនាគត៖ សក្តានុពលធំទូលំទូលាយសម្រាប់កិច្ចសហប្រតិបត្តិការ

ការសម្លឹងមើលទៅអនាគត កិច្ចសហប្រតិបត្តិការចិន-កម្ពុជាមានសក្តានុពលយ៉ាងច្រើន និងអនាគតមានការរីកចម្រើន។ ជាមួយនឹងការអនុវត្តកាន់តែស៊ីជម្រៅនៃគំនិតផ្តួចផ្តើម “ខ្សែក្រវាត់មួយ និងផ្លូវមួយ” កិច្ចសហប្រតិបត្តិការរវាងចិន និងកម្ពុជាក្នុងវិស័យហេដ្ឋារចនាសម្ព័ន្ធ ពាណិជ្ជកម្ម និងវិនិយោគ ត្រូវបានគេរំពឹងថានឹងកាន់តែល្អប្រសើរបន្ថែមទៀត។ ភាពខ្លាំងរបស់ចិនក្នុងវិស័យដែលកំពុងរីកចម្រើន ដូចជាសេដ្ឋកិច្ចឌីជីថល និងថាមពលបៃតងនឹងផ្តល់នៅកម្លាំងចលករថ្មីទៅក្នុងកិច្ចសហប្រតិបត្តិការចិន-កម្ពុជា។ ប្រទេសទាំងពីរអាចពង្រឹងកិច្ចសហប្រតិបត្តិការក្នុងវិស័យដូចជាកសិកម្មឌីជីថល និងឧស្សាហកម្មឆ្លាតវៃ ហើយរួមគ្នាស្វែងរកគំរូអភិវឌ្ឍន៍ប្រកបដោយចីរភាព។ នៅកម្រិតកិច្ចសហប្រតិបត្តិការក្នុងតំបន់ ចិន និងកម្ពុជាអាចពង្រឹងកិច្ចសហប្រតិបត្តិការជាមួយប្រទេសជាសមាជិកផ្សេងទៀតក្រោមយន្តការពហុភាគី ដូចជាអង្គការសហប្រតិបត្តិការសៀងហៃ ដើម្បីរួមគ្នាឆ្លើយតបទៅនឹងបញ្ហាប្រឈមជាសាកល ហើយចូលរួមចំណែកកាន់តែច្រើនដល់សន្តិភាព និងការអភិវឌ្ឍន៍ក្នុងតំបន់។ លើសពីនេះ ការផ្លាស់ប្តូរ និងកិច្ចសហប្រតិបត្តិការរវាងចិន និងកម្ពុជាក្នុងវិស័យអប់រំ វិទ្យាសាស្ត្រ និងវប្បធម៌ក៏នឹងបន្តពង្រីក ដោយដាក់គ្រឹះដ៏រឹងមាំបន្ថែមទៀតសម្រាប់ការអភិវឌ្ឍយូរអង្វែង និងស្ថិរភាពនៃទំនាក់ទំនងទ្វេភាគី។

ការធ្វើដំណើរទៅចិន ចូលរួមកិច្ចប្រជុំលើកទី ២៥ នៃក្រុមប្រឹក្សាប្រមុខរដ្ឋ នៃសមាជិកអង្គការសហប្រតិបត្តិការសៀងហៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា គឺជាសញ្ញាមួយដែលបញ្ជាក់យ៉ាងច្បាស់នៃទំនាក់ទំនងមិត្តភាពរវាងចិន និងកម្ពុជា។ ឥទ្ធិពលរបស់ចិននៅក្នុងអង្គការសហប្រតិបត្តិការសៀងហៃបានផ្តល់ការគាំទ្រយ៉ាងរឹងមាំដល់កិច្ចសហប្រតិបត្តិការចិន-កម្ពុជា។ សមិទ្ធិផលនៃកិច្ចសហប្រតិបត្តិការចិន-កម្ពុជាបានបង្ហាញពីខ្លឹមសារនៃមិត្តភាពរវាងប្រទេសទាំងពីរ ហើយនិន្នាការនៃកិច្ចសហប្រតិបត្តិការនាពេលអនាគតបង្ហាញថា ទំនាក់ទំនងចិន-កម្ពុជា នឹងឈានដល់កម្រិតកាន់តែខ្ពស់ថែមទៀត។ ក្រោមកាលានុវត្តភាពប្រវត្តិសាស្ត្រថ្មី ចិន និងកម្ពុជាគួរតែធ្វើការរួមគ្នា ដើម្បីពង្រឹងកិច្ចសហប្រតិបត្តិការកាន់តែស៊ីជម្រៅ រួមគ្នាបង្កើតអនាគតកាន់តែល្អប្រសើរ៕