ចិនផ្តល់ជំនួយឥតសំណង ៤,៤ លានដុល្លារដល់គម្រោងលុបបំបាត់មីននៅកម្ពុជារយៈពេល ១ ឆ្នាំ
រដ្ឋាភិបាលចិនបានប្រកាសផ្តល់ជំនួយឥតសំណងចំនួន ៤,៤ លានដុល្លារអាម៉េរិក ដល់មជ្ឈមណ្ឌលសកម្មភាពកម្ចាត់មីនកម្ពុជា (CMAC) សម្រាប់រយៈពេល ១ ឆ្នាំ ក្នុង “គម្រោងជំនួយចិនលុបបំបាត់គ្រាប់មីននៅកម្ពុជា”។
ចិនបានប្រកាសផ្តល់ជំនួយឥតសំណងចំនួន ៤,៤ លានដុល្លារនេះ ក្រោយទីភ្នាក់ងារសហរដ្ឋអាម៉េរិកសម្រាប់ការអភិវឌ្ឍអន្តរជាតិ (USAID) ប្រកាសផ្អាកជំនួយសម្រាប់លុបបំបាត់មីននៅកម្ពុជាតាមបទបញ្ជារបស់លោក ដូណាល់ ត្រាំ ប្រធានាធិបតីសហរដ្ឋអាម៉េរិក។
លោក ហេង រតនា ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយក CMAC បានឱ្យដឹងលើទំព័រហ្វេសប៊ុកផ្លូវការថា៖ នៅថ្ងៃទី៥ ខែកុម្ភៈ ឆ្នាំ២០២៥ រដ្ឋាភិបាលចិនបានសម្រេចផ្តល់ជំនួយឥតសំណងជូនរាជរដ្ឋាភិបាលកម្ពុជា ដែលមានថវិកាសរុបចំនួន ៤,៤ លានដុល្លារ ដើម្បីគាំទ្រដល់ CMAC ក្នុងការបោសសម្អាតមីននៃ “គម្រោងជំនួយចិនលុបបំបាត់គ្រាប់មីននៅកម្ពុជា” (The China-Aided Cambodia Landmine Elimination Projection) សម្រាប់រយៈពេល ១២ ខែ (១ មីនា ២០២៥-២៨ កុម្ភៈ ២០២៦) ដោយធ្វើប្រតិបត្តិការបោសសម្អាតមីននៅខេត្តចំនួន ៧ រួមមាន ខេត្តកំពង់ធំ សៀមរាប ឧត្តរមានជ័យ ព្រះវិហារ ស្ទឹងត្រែង ក្រចេះ និង (មណ្ឌលសុនខ) ខេត្តកំពង់ឆ្នាំង។
លោក ហេង រតនា បានឱ្យដឹងទៀតថា តាមរយៈគម្រោងជំនួយនេះ ក្រៅពីគាំទ្រដល់សកម្មភាពកម្ចាត់មីន វាក៏នឹងគាំទ្រដល់អ្នកជំនាញបច្ចេកទេសជាង ៤០០ នាក់របស់ CMAC និងត្រូវអនុវត្តកិច្ចប្រតិបត្តិការសកម្មភាពសំខាន់ៗមួយចំនួនទៀត ដូចជា៖ ១. ការបោសសម្អាតផ្ទៃដីដែលមានបញ្ហាគ្រាប់មីន និងសំណល់យុទ្ធភណ្ឌសល់ពីសង្គ្រាមដែលមិនទាន់ផ្ទុះចំនួនជាង ៣ ៤០០ ហិកតា។ ២. ការស្រាវជ្រាវព័ត៌មានសំណល់យុទ្ធភណ្ឌសល់ពីសង្គ្រាមដែលមិនទាន់ផ្ទុះ និងគ្រាប់បែកចង្កោមតាមខេត្តគោលដៅខាងលើ។ ៣. ពង្រឹងសមត្ថភាពវិទ្យាស្ថានបច្ចេកទេសសុនខ។ ៤. ពង្រឹងសមត្ថភាពថ្នាក់ក្រោមជាតិលើការអប់រំគ្រោះថ្នាក់ដោយសារមីន និងសង្គ្រោះជនពិការដោយសារមីន។
លោកបន្ថែមថា គម្រោងជំនួយចិនលុបបំបាត់គ្រាប់មីននៅកម្ពុជាក្នុងឆ្នាំ២០២៥ នេះ គឺជាជំនួយឆ្នាំទី៣ នៃដំណាក់កាលទី៣ ដែលមានកញ្ចប់ថវិកាសរុបចំនួន ១៣,២ លានដុល្លារ។
ក្រោយលោក ដូណាល់ ត្រាំ ឡើងកាន់តំណែងជាប្រធានាធិបតីសហរដ្ឋអាម៉េរិក លោកបានប្រកាសផ្អាកផ្ដល់ជំនួយតាមរយៈ USAID ទៅកាន់ភាគីទទួលជំនួយរយៈពេល ៣ ខែ។ ក្រោយការផ្អាកនេះ CMAC របស់កម្ពុជា ក៏បានប្រកាសផ្អាកកិច្ចប្រតិបត្តិការបោសសម្អាតមីនជាបណ្តោះអាសន្នរយៈពេល ៨៥ ថ្ងៃ (គិតពីថ្ងៃទី២៥ ខែមករា ឆ្នាំ២០២៥) នៅខេត្តចំនួន ៨ រួមមានខេត្តកំពង់ចាម ក្រចេះ មណ្ឌលគិរី រតនគិរី ស្ទឹងត្រែង ត្បូងឃ្មុំ ស្វាយរៀង និង ខេត្តព្រៃវែង រហូតដល់មានការជូនដំណឹងជាថ្មី៕