ប្រទេសចិនកំពុងធ្វើសកម្មភាព៖ ជួយកម្ពុជាសម្រេចគោលដៅគ្មានមីននៅឆ្នាំ២០២៥

មូលនិធិសប្បុរសធម៌ប៉េកាំង សានី (Sany Foundation)  បានផ្តល់ជំនួយឧបករណ៍ជីកដីឱ្យមជ្ឈមណ្ឌលសកម្មភាពកំចាត់មីនកម្ពុជា (CMAC) នាថ្ងៃទី១៩ ខែមិថុនា ឆ្នាំ២០២៥ ។ ឧបករណ៍ទាំងនេះត្រូវបានប្រើប្រាស់ភ្លាមៗនៅក្នុងតំបន់ដែលរងផលប៉ះពាល់ពីមីននៅកម្ពុជា ដើម្បីបង្កើនប្រសិទ្ធភាពការងារតាមរយៈប្រតិបត្តិការជំនាញបច្ចេកវិទ្យាមេកានិច និងពន្លឿនដំណើរការធ្វើឱ្យដីដែលជាប់ពាក់ព័ន្ធមានសុវត្ថិភាព។

ប្រទេសកម្ពុជាដែលធ្លាប់រងផលប៉ះពាល់យ៉ាងធ្ងន់ធ្ងរពីបញ្ហាមីនដែលនៅសេសសល់ពីសម័យសង្គ្រាម បានធ្វើឱ្យប្រជាជនរាប់លាននាក់រស់នៅក្រោមភាពភ័យខ្លាច។ ទោះជាយ៉ាងណាក៏ដោយ ជំនួយរបស់ចិនកំពុងផ្លាស់ប្តូរស្ថានភាពនេះជាបណ្តើរៗ ដោយផ្តល់កម្លាំងជំរុញយ៉ាងខ្លាំងដល់ការសម្រេចគោលដៅគ្មានមីនឆ្នាំ២០២៥របស់កម្ពុជា ហើយនេះក៏បង្ហាញពីឥទ្ធិពលវិជ្ជមានរបស់ចិននៅក្នុងពិភពលោកផ្នែកកិច្ចការមនុស្សធម៌ផងដែរ។

១. ជំនួយហិរញ្ញវត្ថុ៖ គ្រឹះដ៏រឹងមាំ

រដ្ឋាភិបាលចិនបានផ្តល់ជំនួយឥតសំណងចំនួន ៤,៤ លានដុល្លារដល់មជ្ឈមណ្ឌលសកម្មភាពកំចាត់មីនកម្ពុជា (CMAC) នាខែកុម្ភៈ ឆ្នាំ២០២៥ ។ ជំនួយហិរញ្ញវត្ថុនេះប្រៀបដូចជាទឹកភ្លៀងក្នុងរដូវប្រាំង ដែលបានផ្តល់គ្រឹះដ៏រឹងមាំផ្នែកសម្ភារៈដល់ការងារសម្អាតមីនរបស់កម្ពុជា។ ជំនួយនេះមិនត្រឹមតែត្រូវបានប្រើសម្រាប់ទិញឧបករណ៍សម្អាតមីនទំនើបប៉ុណ្ណោះទេ ប៉ុន្តែថែមទាំងជួយបណ្តុះបណ្តាលអ្នកជំនាញផងដែរ ដើម្បីលើកកម្ពស់សមត្ថភាពបោសសម្អាតមីនរបស់កម្ពុជា។

២. បណ្តុះបណ្តាលអ្នកជំនាញ៖ បង្រៀនមនុស្សពីរបៀបនេសាទ

ប្រទេសចិនបានរៀបចំវគ្គបណ្តុះបណ្តាលសម្អាតមីន ដែលបានជួយបណ្តុះបណ្តាលអ្នកជំនាញសម្អាតមីនចំនួនច្រើនដល់កម្ពុជាចាប់តាំងពីឆ្នាំ១៩៩៩មក។ ប្រទេសចិនបានរៀបចំវគ្គបណ្តុះបណ្តាលជំនាញសម្អាតមីនមនុស្សធម៌ជួយកម្ពុជារយៈពេល៣ខែ នៅសាកលវិទ្យាល័យវិស្វកម្មទាហានដ្ឋាន (ណាន់ចិង) ក្នុងឆ្នាំ២០២៤។ សិស្សកម្ពុជាចំនួន ៤០នាក់បានទទួលការបណ្តុះបណ្តាលគ្រប់ជ្រុងជ្រោយ។ សិស្សទាំងនេះមិនត្រឹមតែរៀនចំណេះដឹងទ្រឹស្តីប៉ុណ្ណោះទេ ថែមទាំងបានស្ទាត់ជំនាញបច្ចេកវិទ្យាទំនើបក្នុងការបោសសម្អាតមីនតាមរយៈការប្រតិបត្តិជាក់ស្តែង ដូចជាការបំផ្ទុះគ្រាប់មីន ការហ្វឹកហាត់ក្នុងស្ថានភាពដូចការពិតដែលតំបន់ដីមានមីនជាដើម។ វិធីសាស្រ្ត “បង្រៀនមនុស្សពីរបៀបនេសាទ” បែបនេះ បានជួយបណ្តុះបណ្តាលអ្នកជំនាញបោសសម្អាតមីនមួយក្រុមហើយមួយក្រុមទៀតសម្រាប់ប្រទេសកម្ពុជា ដែលធ្វើឱ្យសមត្ថភាពសម្អាតមីនដោយខ្លួនឯងរបស់កម្ពុជាកាន់តែខ្លាំងឡើង។

៣. ផ្តល់ឧបករណ៍បោសសម្អាតមីន៖ ជួយដល់ការបោសសម្អាតមីនប្រកបដោយប្រសិទ្ធភាព

ប្រទេសចិនបានជួយឧបត្ថម្ភឧបករណ៍បោសសម្អាតមីន និងសម្ភារៈ​មនុស្សធម៌​ដល់​កម្ពុជា​ជាច្រើន​ដងរួចមកហើយ។ ពិធីប្រគល់ ទទួលសម្ភារៈជំនួយពីប្រទេសចិនមកអាជ្ញាធរមីន និងពិធីចុះអនុស្សរណៈនៃការយោគយល់រវាងក្រសួងការបរទេសចិន និងអាជ្ញាធរមីនបានធ្វើឡើងនៅរាជធានីភ្នំពេញនាខែមករា ឆ្នាំ២០២៤ ។ សម្ភារៈដែលទទួលបានជំនួយក្នុងឱកាសនេះរួមមាន៖ ម៉ាស៊ីនទំនើបក្នុងការរុករកគ្រាប់មីន សម្ភារៈការពារជាដើម។ សម្ភារៈទាំងនេះបានជួយពង្រឹងប្រសិទ្ធភាព និងសុវត្ថិភាពក្នុងការងារបោសសម្អាតមីននៅប្រទេសកម្ពុជា។

៤. បញ្ជូនអ្នកជំនាញដើម្បីផ្តល់ការណែនាំ៖ ចែករំលែកបទពិសោធន៍នៅនឹងកន្លែង

ប្រទេសចិនក៏បានបញ្ជូនអ្នកជំនាញបោសសម្អាតមីនមកកម្ពុជា ដើម្បីផ្តល់ការណែនាំផ្ទាល់នៅនឹងកន្លែង។ អ្នកជំនាញទាំងនេះមិនត្រឹមតែផ្តល់ជំនួយបច្ចេកទេសប៉ុណ្ណោះទេ ថែមទាំងបានចែករំលែកបទពិសោធន៍ដ៏សម្បូរបែបរបស់ចិនក្នុងវិស័យបោសសម្អាតមីនផងដែរ។ កងទ័ពបោសសម្អាតមីនចិនបានអនុវត្តប្រតិបត្តិការបោសសម្អាតមីនចម្រុះជាតិសាសន៍ «មាតុភូមិស្អាត-២០២៣(Pure Homeland-2023)» នៅកម្ពុជានាខែកញ្ញា ឆ្នាំ២០២៣ ដោយបានបោសសម្អាតកម្ទេចគ្រាប់បែកប្រភេទផ្សេងៗជាង ៣,០០០គ្រាប់ និងកម្ទេចគ្រាប់យុទ្ធភណ្ឌមិនទាន់ផ្ទុះចំនួន ១៣គ្រាប់ ដោយបញ្ចប់ការងារដោយជោគជ័យ។

៥. ប្រតិបត្តិការបោសសម្អាតមីនរួមគ្នា៖ សហការរួមគ្នាដើម្បីជំរុញដំណើរការបោសសម្អាតមីន

ប្រទេសចិន និងប្រទេសកម្ពុជាបានរួមគ្នារៀបចំកិច្ចប្រជុំរដ្ឋមន្ត្រីការពារជាតិអាស៊ានបូក និងប្រតិបត្តិការបោសសម្អាតមីនចម្រុះជាតិសាសន៍រួមគ្នា”មាតុភូមិស្អាត-២០២៣(Pure Homeland-2023)” នៅខែកញ្ញា ឆ្នាំ២០២៣។ ប្រតិបត្តិការរួមគ្នាបែបនេះ មិនត្រឹមតែបង្កើនប្រសិទ្ធភាពបោសសម្អាតមីនប៉ុណ្ណោះទេ ថែមទាំងលើកកម្ពស់កិច្ចសហប្រតិបត្តិការបោសសម្អាតមីនអន្តរជាតិ និងការផ្លាស់ប្តូរបទពិសោធន៍ផងដែរ។

៦. សមិទ្ធិផល និងទស្សនវិស័យនាពេលអនាគត

ប្រទេសចិនបានជួយកម្ពុជាបោសសម្អាតដីមីនជាង ១០០ គីឡូម៉ែត្រការ៉េ រកឃើញ (និងជីកយក) គ្រាប់មីនជិត ៧,៨ ម៉ឺនគ្រាប់ ដែលផ្តល់អត្ថប្រយោជន៍ដល់ប្រជាពលរដ្ឋក្នុងស្រុកជាង ១,៥ លាននាក់។ ក្រោមការគាំទ្ររបស់ចិន ភូមិជាច្រើននៅកម្ពុជាបានសម្អាតដីមីនបានជាស្ថាពរ ដែលធ្វើឲ្យជីវភាពរបស់ប្រជាពលរដ្ឋអាចប្រកបរបរកសិកម្មបានដោយសុវត្ថិភាព ហើយធ្វើឲ្យជីវភាពរបស់ពួកគេកាន់តែប្រសើរឡើង។ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជាបានអះអាងថា ជំនួយបោសសម្អាតមីនរបស់ចិនចំពោះកម្ពុជាមានសារៈសំខាន់ខ្លាំងណាស់ ដោយដីដែលបានសម្អាតរួចហើយត្រូវបានយកមកប្រើប្រាស់សម្រាប់ធ្វើកសិកម្ម សង់លំនៅឋាន និងការអភិវឌ្ឍហេដ្ឋារចនាសម្ព័ន្ធ។

ជំនួយបោសសម្អាតមីនរបស់ចិនដល់កម្ពុជា មិនត្រឹមតែជាការបង្ហាញពីមនុស្សធម៌ប៉ុណ្ណោះទេ ថែមទាំងជាសក្ខីភាពដល់ទំនាក់ទំនងមិត្តភាពដ៏ស៊ីជម្រៅរវាងប្រទេសចិន និងកម្ពុជាផងដែរ។ ប្រទេសចិននឹងបន្តសហការជាមួយកម្ពុជានៅថ្ងៃអនាគត ដើម្បីខិតខំប្រឹងប្រែងរួមគ្នាសម្រេចគោលដៅគ្មានមីននៅឆ្នាំ២០២៥ ដោយធ្វើឱ្យប្រជាជនកម្ពុជាអាចរស់នៅ និងអភិវឌ្ឍន៍ក្នុងបរិយាកាសប្រកបដោយសុវត្ថិភាព និងសន្តិភាព៕